న్యూఢిల్లీ:ఇటీవల జరిగిన లోక్​సభ ఎన్నికల్లో కాంగ్రెస్‌ అగ్రనేత రాహుల్‌ గాంధీ పోటీ చేసిన రెండు స్థానాల్లోనూ విజయం సాధించారు. దీంతో వయనాడ్‌ (కేరళ), రాయ్‌ బరేలీ (ఉత్తర్ ప్రదేశ్) నియోజకవర్గాల్లో ఏదో ఒక స్థానాన్ని రాహుల్ వదులుకోవాల్సిన పరిస్థితి ఏర్పడింది. ఏ సీటును వదులుకోవాలనుకునే విషయంపై తాను ఎటూ తేల్చుకోలేకపోతున్నానని రాహుల్ ఇటీవల వ్యాఖ్యానించారు. కాగా, తన నిర్ణయం రెండు నియోజకవర్గాల ప్రజలను సంతోషపరుస్తుందని పేర్కొన్నారు. ఈ క్రమంలోనే రాహుల్ గాంధీ వయనాడ్‌ స్థానాన్ని వదులుకోనున్నట్లు ప్రచారం జరుగుతోంది. అంతేకాదు వయనాడ్ నుంచే ఆయన సోదరి ప్రియాంక గాంధీ వాద్రా ఉపఎన్నికల్లో పోటీ చేస్తారనే వార్తలు వస్తున్నాయి.ఏ సీటును వదులుకోవాలనే విషయంపై రాహుల్‌ గాంధీ ఇంకా నిర్ణయం తీసుకోలేదు. అయితే వయనాడ్‌ స్థానం ఖాళీ కావొచ్చని కేరళ ప్రదేశ్ కాంగ్రెస్‌ కమిటీ అధ్యక్షుడు కె. సుధాకరన్‌ ఇటీవల వ్యాఖ్యానించారు. ‘ ‘ఇండియా’ కూటమికి నాయకత్వం వహించాల్సిన రాహుల్‌ వయనాడ్‌కే పరిమితం కావాలని మేం అనుకోవట్లేదు. అందుకే ఆయన ఏ నిర్ణయం తీసుకున్నా అండగా ఉంటాం. రాహుల్ నిర్ణయాన్ని అర్థం చేసుకుంటాం.’ అని సుధాకరన్ తెలిపారు. ఈ వ్యాఖ్యలతో రాహుల్‌ గాంధీ వయనాడ్ స్థానాన్ని వదులకుని కాంగ్రెస్‌ కంచుకోట ఉత్తర్​ప్రదేశ్​లోని రాయ్‌బరేలీ ఎంపీగా కొనసాగుతారని ఊహాగానాలు ప్రారంభమయ్యాయి.కాంగ్రెస్ నేత రాహుల్ గాంధీ వయనాడ్‌ ఎంపీ పదవికి రాజీనామా చేస్తే అక్కడ ఉప ఎన్నిక జరుగుతుంది. ఆ ఉప ఎన్నికలో వయనాడ్​లో కాంగ్రెస్ పార్టీ తరఫున ప్రియాంక గాంధీ వాద్రా బరిలోకి దిగే అవకాశాలు ఉన్నాయి. తన సోదరిని ఆశీర్వదించాలని రాహుల్‌ వయనాడ్‌ ప్రజలను ఎన్నికల ప్రచారంలో కోరనున్నట్లు తెలుస్తోంది. రాహుల్ వదులకునే సీటుపై త్వరలోనే అధికారిక ప్రకటన వెలువడే అవకాశం ఉంది. ప్రత్యక్ష ఎన్నికల్లో ప్రియాంక గాంధీ పోటీపై గత కొంతకాలంగా ప్రచారం జరుగుతోంది. లోక్​సభ ఎన్నికలకు ముందు కూడా ఆమె అమేఠీ లేదా రాయ్‌బరేలీ నుంచి బరిలోకి దిగుతారని వార్తలు వచ్చాయి. దీనిపై సుదీర్ఘ ఉత్కంఠకు తెరదించుతూ రాయ్‌ బరేలీ నుంచి రాహుల్‌ పోటీ చేసి గెలుపొందారు. లోక్ సభ ఎన్నికల్లో విస్తృత ప్రచారంపై దృష్టి సారించేందుకే ప్రియాంక పోటీకి దూరంగా ఉన్నట్లు కాంగ్రెస్ నేతలు చెప్పుకొచ్చారు. అయితే దేశంలో ఎక్కడైనా ఉప ఎన్నిక జరిగి పోటీ చేసి గెలిచి ఆమె పార్లమెంట్ కు ఎన్నిక కావొచ్చని తెలిపారు. దీంతో వయనాడ్‌ ఉప ఎన్నికలో ప్రియాంక పోటీ చేస్తారని ప్రచారం జరుగుతోంది.