‘జమిలి’ ఎన్నికలపై త్వరలో కేబినెట్​ ముందుకు నివేదిక!

న్యూఢిల్లీ :‘ఒకే దేశం – ఒకే ఎన్నిక’ నిర్వహణ సాధ్యాసాధ్యాలపై మాజీ రాష్ట్రపతి రామ్​నాథ్​ కోవింద్ నేతృత్వంలోని ఉన్నత స్థాయి కమిటీ సమర్పించిన నివేదికను కేంద్ర మంత్రివర్గం ముందు ఉంచాలని న్యాయ మంత్రిత్వ శాఖ యోచిస్తున్నట్లు సంబంధిత వర్గాలు శుక్రవారం తెలిపాయి. సాధ్యమైనంత త్వరగా కేబినెట్​కు నివేదికను సమర్పించాలనుకుంటున్నట్లు చెప్పాయి. ఇది న్యాయ మంత్రిత్వ శాఖ లెజిస్లేటివ్​ విభాగం 100రోజుల అజెండాలో భాగమే అని వెల్లడించాయి. లోక్​సభ ఎన్నికలకు ముందు, తదుపరి ప్రభుత్వం కోసం 100రోజుల అజెండాను రూపొందించాలని ప్రధాని నరేంద్ర మోదీ అన్ని కేంద్ర మంత్రిత్వ శాఖలు, విభాగాలను ఆదేశించారు.రామ్​నాథ్​ కోవింద్ నేతృత్వంలో గతేడాది ఏర్పాటు చేసిన ఉన్నత స్థాయి కమిటీ, తన నివేదికను మార్చి 15న రాష్ట్రపతి ద్రౌపది ముర్ముకు సమర్పించింది. అందులో, మొదటి దశగా లోక్​సభ, రాష్ట్రాల అసెంబ్లీలకు ఒకే సమయంలో ఎన్నికలు నిర్వహించాలని సిఫారసు చేసింది. అనంతరం 100రోజుల్లోపు స్థానిక సంస్థల ఎన్నికలు జరపాలను సూచించింది. అంతేకాకుండా ఈ సిఫారసుల అమలును పరిశీలించేందుకు ఒక ‘అమలు బృందం’ నియమించాలని ప్రతిపాదించింది. వనరులను ఆదా చేయడం, అభివృద్ధి, సామాజిక ఐక్యతను పెంపొందించడం, ప్రజాస్వామ్య నిర్మాణాన్ని బలంగా చేయడం, దేశ ఆకాంక్షలను సాకారం చేయడంలో ఈ జమిలి ఎన్నికలు సహాయపడతాయని కమిటీ నివేదికలో పేర్కొంది.దేశవ్యాప్తంగా ఒకేసారి ఎన్నికలు జరపడం కోసం 18 రాజ్యాంగ సవరణలను ఉన్నత స్థాయి కమిటీ సిఫారసు చేసింది. అయితే అందులో చాలా వరకు సవరణలకు రాష్ట్రాల ఆమోదం అవసరం లేదు. ఈ సవరణల్లో కొన్నింటిని పార్లమెంట్ ఆమోదించాల్సి ఉంటుంది. ఇక ఒకే ఓటర్ జాబితా, ఒకే ఓటరు ఐడీ కార్డుకు సంబంధించి కమిటీ ప్రతిపాదించిన మార్పులకు కనీసం సగం రాష్ట్రాల ఆమోదం అవసరం. ఇదిలా ఉండగా జమిలి ఎన్నికల విషయమై లా కమిషన్​ కూడా సొంతంగా ఓ నివేదిక రూపొందిస్తున్నట్లు తెలుస్తోంది. లోక్​సభ, రాష్ట్ర అసెంబ్లీలు, మున్సిపాలిటీలు, పంచాయతీలు వంటి స్థానిక సంస్థలకు ఒకేసారి ఎన్నికలు నిర్వహించాలని లా కమిషన్ ప్రతిపాదించే అవకాశం ఉందని సమాచారం.’ఒకే దేశం- ఒకే ఎన్నికలు’ నిర్వహణ సాధ్యాసాధ్యాలను పరిశీలించేందుకు మాజీ రాష్ట్రపతి రామ్​నాథ్ కోవింద్ నేతృత్వంలో 2023 సెప్టెంబర్​లో ఎనిమిది మంది నిపుణుల కమిటీని కేంద్ర ప్రభుత్వం ఏర్పాటు చేసింది. ఈ కమిటీలో అధికార, ప్రతిపక్ష నేతలతో పాటు శాసన, న్యాయ, ఆర్థిక నిపుణులకు చోటు కల్పించింది. రామ్​నాథ్​ కోవింద్​తో పాటు కేంద్ర హోంమంత్రి అమిత్ షా, కాంగ్రెస్ ఎంపీ అధీర్ రంజన్ చౌదరి, రాజ్యసభ మాజీ ప్రతిపక్ష నేత గులాం నబీ ఆజాద్, 15వ ఆర్థిక సంఘం మాజీ ఛైర్మన్ ఎన్​కే సింగ్, లోక్​సభ మాజీ సెక్రటరీ జనరల్ డాక్టర్ సుభాశ్ సీ కశ్యప్, సీనియర్ అడ్వొకేట్ హరీశ్ సాల్వే, మాజీ చీఫ్​ విజిలెన్స్ కమిషనర్ సంజయ్ కొఠారి ఉన్నారు.